فى العربية أنا شفت

فى العربية انا شفت
شفت سولق ماسك سيجارة ومشغل تسجيل
ولابس سلسله وشعره طويل
ومطول قنه ورابط على ايده منديل
شعره علىالموضه واخر ترويشه
ومشغل اغنيه حجرين على الشيشه
عمال يجرى بسرعه ويفوت
ميهموش من عاش ومين هيموت
كل همه انه يخلص الدور
ما هو داير فى الساقيه زى الثور
والله معذور

فى العربيه انا شفت
تباع زى البتاع واقف
بينادى امبابه ومن اللجنه خايف
عمال شيب ومن العربيات مش شايف
اصل السواق مهوش ترخيص
شايلنا كده زى البلاليص
تباع بيعاكس فى البنات
مرحمش واحده من الستات
تباع زى البتاع فعلا


فى العربيه انا شفت
واحد فرفور
امور كده وغندور
بيقلد مطرب مشهور
رافع شعره ومبين ضهره
ولافى شيىء فى الدنيا قهره
المهم انه يسقط البنطلون
ميهموش بعد كده ايه هيكون
مقضيها مع كل البنات
بيبع ويالف احلى الحكايات
نسى انه عنده اخوات
المهم انه يقلد مطرب الجيل
ويكون منه نسخه تفصيل
انسان مريض ملوش شخصيه
نسى مستقبله ومعنى المسئوليه

فى العربيه انا شفت
شفت واحد بيفكر فى مراته
قد ايه خيبته فى حياته
واحبطط كل احلامه وامنياته
عمال يفكر ميرجعش البيت
ويخرج ويظبط الظبابيط
عمال بيفكر فى طلباتها الكتير
عايزاه شغال زىى الحمير
وللطاحونه يكون اسير
بيفكر فى مراته اللى مبتقدرش
وفى غير نفسها مبتفكرش
زى الحجر مبتتاثرش
هات هات اخص عليها
لاقيته بينفخ ويلعن فيها
ويلعن اليوم اللى ارتبط فيه بيها
شكله بقى فى الستين
مع انه فى التلاته والتلاتين
والله ده مسكين

فى العربيه انا شفت
شفت واحده قاعده جنب الشباك
عماله تبص هنا وهناك
عامله فى وشها تغيير
يمكن تلاقى حد فيها اسير
نفسها يجيلها اى عريس
كريم طيب او حتى خبيث
هى عايزه وخلاص تتجوز
ميهماش هتفرح ولا هتبووز
مش فارق معها الشخصيه
المهم الشقه والمهيه
مش يتفكر فى المسئوليه
عايزه جوز وخلاص
راجل او حتى بلاص
على فكرة المكياج مش تغييير
والجواز ده امر يسير
بس التفكير كده عيب
كل حاجه قسمه ونصيب

فى العربيه انا شفت
شفت واحده قاعده فى نص الكراسى
شكلها هاديه وعقلها راسى
عينها بتلف وتدور
مانعها عن حلمها الف سور
شفت معها بنت ولد
ابوهم سابهم فى كبد
اصل البيه صاحب كيف
الكيف عنده اهم من الرغيف
وايه كمان فى القمار حريف
حياتها بقت كابوش مخيف
واهلها فى الطراوه زى الحلاليف
وفجــأه لاقيت دمعه نزلت من عينيها
ساعتها كان نفسى امسك ايديها
واطيب خاطرها واهون عليها
اهون عليها سوء الاختيار
واقول لها ترضى بالاقدار
والله انا بقيت محتار

فى العربيه انا شفت
ناس فى الكنبه الورانيه
بيضحكوا ويخططوا لليله ديه
اصلهم ماسكبن علبه مستخبيه
وطلعوا منها حاجه بنيه
قال هتخلى لليلتهم ميه ميه
وهتخلى حياتهم ورديه
بيصرفوا عليه كل المهيه
بيهربوا بالنى من المسئوليه
خلاص بقى ليه عندهم الاولويه
حياتهم كلها بقت حشيش
حياتهم من غيره متمشيش
الدنيا كلها عندهم كيف
اهم عندهم منالرغيف
والله ده شيىء مخبف
فى العربيه انا شفت
شفت نفسى قاعد بعيد
مرة حزين ومره سعيد
شفت نفسى واحد متغيير من همه
ناسى نفسه بيفكر فى ابوه وامه
تعبان فى لدنيا ومحتار
من حته لحته زى الطيار
بيلف فى الصاقيه زى الثور
بيدور لنفسه على اى دور
قلبه نسى معنى الافراح
من يوم ما طعم الحب راح
شفت على خدى شويىه دموع
نزلوا غصب عنى من قلبى الموجوع
نزلوا منى كده فى العربيه
وانا ولا بيه ولا عليه
نزلوا عشان التفكير
وعشان لذكرياتى اسير
نزلوا عشان مات القلب
نزلوا عشان ضاع الحب
الهموم بقت زى السموم
سموم بدات فى الانتشار
لقيتنى بفكر فى الانتحار
ولكن
نزلت من العربيه وعرفت
ان الله العلى الغفار
له حكمه فى تسيير الاقدار
حكمه فى الحزن والافراح
والالام والجراح
حكمه فى الحر والاسير
والغنى والفقير
وعظمة حكمته فى النصيب
فهو السميع عالم الغيب

وارتعدت على صوت الاذان وقلت
اللهم لك الحمد على حالى
اللهم لك الحمد على كثير من النعم
اللهم انى نظرت لحال العباد
وجدتنى لغيرى سيد الاسياد
فلك الحمد