عايزين تعرفوا نزلنا التحرير تاني لية؟؟؟؟

لما تقوللي مفيش أمن بعد 9 شهور....رغم المليارات اللى إتصرفت على الشرطة
يبقى في حاجة غلط



لما تقوللي إن الفوضى هتستمر لحد شهر 5 / 2013 موعد إنتخاب الرئيس
يبقي فيه حاجة غلط



لما تقوللي إن لحد النهاردة مفيش و لا جنيه رجع من فلوسنا اللي عند الحرامية
يبقي فيه حاجة غلط



لما تقوللي إن الشرطة لسه بتتعامل بنفس العنجهية والافترا ان لم يكن أسوأ من قبل الثورة
والظباط بيتراهنو على اللى يصيب عين الثوار اللى هما اصلا مصابي الثورة واهالى الشهداء
يبقى فى حاجة غلط



لما تقوللي إن أسبانيا أخدت من حسين سالم 32,5 مليون يورو ومباني بقيمة 10 مليون يورو
و احنا مشوفناش منه مليم من فلوسنا اللي سرقها
يبقي فيه حاجة غلط



لما تقوللي إن خزينة الدولة مفيهاش فلوس لتحقيق مطالب المواطنين
مع إن في مصر ألاف الموظفين بيقبض الواحد منهم فوق المليون جنيه شهريا
و ومساعدينهم بيقبضوا مئات الآلاف في الشهر
و كمان رجال الأعمال عليهم 100 مليار جنيه ضرائب للدولة
يبقي فيه حاجة غلط



لما تقوللي إن أحد فلول الحزب الوطني هدد بعزل الصعيد و قطع الكهرباء عن مصر
لو تم منعهم من الترشيح لمجلس الشعب و محدش حتي رد عليه
يبقي فيه حاجة غلط



لما تقوللي إن كل الناس اللي بتعارض خونة و عملاء و مأجورين
من غير حكم واحد قضائي يقول كده و لا حتي تحقيق
يبقي فيه حاجة غلط



لما تقوللي إن فيه مؤامرات داخلية و خارجية علي البلد
و ترمي اتهامات يمين وشمال من غير ما تكشف أشخاص و لا مؤامرة
و أنت عندك أمن وطني و مخابرات و جيش
يبقي فيه حاجة غلط



لما تقوللي إن المشير و عمر سليمان و العيسوي
شهدوا في المحكمة ببراءة مبارك من كل التهم
رغم إن البيان رقم 52 للقوات المسلحة قال رفضنا أوامر بإطلاق النار علي المتظاهرين ؟؟
يبقي فيه حاجة غلط



لما تقوللي إن الثوار بيتحاكموا عسكري و مبارك قاعد في مستشفي 7 نجوم
ونائب رئيس الشرطة العسكرية بيضرب تعظيم سلام للعادلي في المحكمة
يبقي فيه حاجة غلط



لما تقوللي إن تونس انتخبت لجنة تأسيسية لوضع دستور جديد و تشكيل حكومة انتقالية
و مصر لسة بتعمل مجلس شعب هاينتخب لجنة تأسيسية لوضع دستور بعد سنة
ومش هيشكل حكومة
يبقي فيه حاجة غلط



لما تقوللي المشير مش طمعان في الحكم
وفى نفس ذات الوقت تلاقي حملة لترشيحه للرئاسة
يبقي فيه حاجة غلط



لما تقوللي إن المجلس العسكري بيعد وثيقة مباديء فوق دستورية
تجعل منه قوة فوق المحاسبة و فوق الشعب و الحكومة و تجعل منه دولة داخل الدولة
يبقي فيه حاجة غلط



انتهى عصر الخوف
انتهى عصر الذل
انتهى عصر البلطجة المقننة

ارجوكم شيــــــــــــــــــــر علشان نعرف الناس رجعنا التحرير ليه