الشعب

يا أيها الشعب المجنون
قاعد بتشرب ليه ينسون
ماسك ف ايدك ولاعة
عمال تبصبص ف الساعة
أطرش وحاطط سماعة
...بطل تشوف أفلام كرتون

يا أيها الشعب الطماع
عمال بتشكي من الأوجاع
كبر دماغك واتسلي
واقرا بقي ف أي مجلة
وارمي طموحك ف السلة
ايه يعني عندك حلم وضاع

يا أيها الشعب الزنان
تتعشي تفطر ب بتنجان
انا جيت ظبطك علي سهوة
وكنت قاعد ع القهوة
أدفي لحسن تستهوي
عندك كنوز لولي ومرجان

يا أيها الشعب المحظوظ
عندك حكومة كنافة باللوز
خلي ف قلبك بقي رحمة
كدبت ياما بقيت فحمة
طول النهار تاكل لحمة
أرحم شوية بقيت كلبوظ 

يا أيها الشعب الكداب
أرحل و أعمل فينا ثواب
مين اللي قالك في تزوير
أزاي هتفهم ف الفوازير
اقرا كويس ف المحاذير
...وبلاش تفكر ف الأحزاب

يا أيها الشعب الفرفور
بنتط ليه من فوق الصور
واللهي عقلك منخوليا
قعد وقشر ف فصوليا
ليه بس تغرق ف ايطاليا
عيل وفوق راسك طرطور

يا أيها الشعب ال موش شعب
مغرور ولابس جزمة بكعب
فالح تلعب ف حواجبك
ولا حد مننا بقي عجبك
دا حنا الحكومة وبنحبك
لزمتها أيه أفلام الرعب