مش بس ثوار بيان العسكري/ حسب الطلب والأمر..
ثوار لحين البتّ.
ولا الشباب الشيك / الطيّب المكسوف
ف استديوهات اللتّ
اللي لا يحدف طوب..
ولا يعرف المولوتوف.
لو عايز الثوار...
راجع شريط الزمن
لو عايز اللي هجم
والموت بيتقدّم
لو عايز اللي حسم
وقت الهلع والخوف
راجع وشوش اتنست
من لوحة التكريم
راجع وشوش غايبة
من لقطة الأفراح..
راجع شريط الزمن
دقق كويس وشوف..
مش ف السيناريو الميري/ المعلن..المُعتمَد
فـ المشهد المحذوف..
لو عايز الثوار..
هما اللي حرقوا القِسم
زنزانة الملايين
هما اللي خلوا البوكس
يجري من المساجين..
هما اللي خلوا الباشا
يبوس أيادي الناس
هما اللي كسروا السور
العالي..يبقى مداس
لو عايز الثوار
مش حتلاقيهم فـ شاشة
ولا فـ اجتماع جنرال
سيبك من الموّال
راجع وشوش الكورال
انزل فـ وقت الخطر
و ادخل لخط النار
هما هناك وقفوا..
هما هناك واقفين ..
محمود عزت
ليست هناك تعليقات:
إرسال تعليق